الخميس، 1 مارس، 2012

دعوة لحضور الاجتماع الأول لمجموعة التوثيق والمساعدة القانونية لجرائم النظام

كلنا عارفين أن النظام عذبنا وقتلنا ونهبنا من أكتر من 30 سنة وكلنا عارفين أن المجرمين كانوا محميين بالقانون ، ولو عاوزين نحاكم المجرمين يبقي لازم نعرف جرائمهم، ممكن نبقي فاكرين جرائم زي حريق قطار الصعيد وكنيسة القديسين والعبارة ومجزرة ماسبيرو أوبورسعيد، بس أكيد جرايمهم أكتر من كده بكتير، فى كل حي ومنطقة فيه ظابط كان بيعذب الناس وأكيد كان فيه مسئول بيسرقنا، واحنا عاوزين نعرفهم ونعرف عملوا ايه، عاوزين نعمل قرار اتهام شعبي الناس اللى تكتبه.
علشان كده هانقعد مع بعض يوم الاربعاء اللى جاي 7 مارس فى مركز هشام مبارك للقانون الساعة 7 نتكلم نعمل دا ازاي نشكل مجموعات من الناس فى كل حته فى مصر علشان يكتبوا قرار الاتهام الشعبي فى كل حي وفى كل مصنع وشركة.
احنا مش هندور بس على الجرائم اللى حصلت قبل خلع مبارك لا احنا كمان هندور جرائم المجلس العسكري والحكومة دلوقتي لاننا شايفين محصلش تغيير كبير لاننا زي ما قتلونا فى حريق قطار الصعيد اتقتلنا فى بورسعيد وفى ماسبيرو.
جايز تبقي انت أو انتي محصلكش حاجة بس ممكن تساعد حد ناس كانوا ضحايا علشان نوصل صوتهم ونكتب حكايتهم، وهايبقي فيه محامين يساعدوكم علشان تعرفوا تكتبوا ايه وايه الحاجات المهمة اللى مفروض نكتبها.
هنكتب حكايات أهالينا وناسنا ونعمل ملفات للمجرمين اللى عذبونا وقتلونا وسرقونا أكتر من 30 سنة علشان الناس تعرف قد أيه المحاكمات اللى بتحصل دلوقتي مسرحية وعلشان لما تبقي فيه محاكمة بجد نبقي جاهزين ونوريهم جرائمهم اللى بجد.
هنستناكم يوم الاربعاء 7 مارس الساعة 7 فى مركز هشام مبارك للقانون
                                                      
للاتصال والتنسيق هبه حجازي 01010022642 أو أحمد راغب 01220624003

ليست هناك تعليقات:

إرسال تعليق