مين حملة حاكموهم؟
هي حملة شعبية مستقلة أسسها مجموعة من اللى شاركوا فىالموجة الأولي من الثورة، وأتأسست فى فبراير 2012، وفكرتها قايمة على أن مفيش ثورة
من غير عدالة تحميها علشان كده قولنا وهنقول عاوزين العدالة الثورية.
ايه مشكلتنا مع المحاكمات اللى بتحصل؟
مشكلتنا أن المحاكمات لبعض رموز نظام مبارك مسرحية !، لان
النيابة العامة جزء من نظام مبارك ومبتتحركش إلا لما تحصل مظاهرات وإذا اتحركت
بتقدم المتهمين من غير دليل، فتكون النتيجة براءة !!
كمان المحاكمات بتحصل عن فترة قصيرة مش على جرائم مبارك
طوال 30 سنة وأكتر، وبيتعاملوا معاها على أساس أن فيه أفراد كانوا مخطئين مش نظام
أجرم وقتل ونهب المصريين.
هنحاكم نظام مبارك أزاي ؟
علشان نحاكم نظام مبارك لازم نطبق عدالتنا الثورية مش
عدالة مبارك، عشان كده عملنا مشروع قانون اسمه العدالة الثورية، لان مفيش ثورة من
غير عدالة تحميها.
يعني أيه عدالة ثورية؟
هي العدالة اللى قايمة على حماية ثورتنا ومؤمنة بيها،
وفى نفس الوقت توفر محاكمة عادلة ومنصفة لمجرمين نظام مبارك على مدار مش أقل من 30
سنة فاتت.
هل العدالة الثورية يعنى عاوزين محاكمات استثنائية أو
محاكمات ثورية؟
أكيد لا !! لان ثورتنا كانت عشان الحرية والكرامة
الإنسانية .المحاكمات اللى احنا عاوزينها محاكمة عادلة ومنصفة بس كمان بتحمي
الثورة ومؤمنة بيها، علشان كده اسمها عدالة ثورية.
حاكمهوم هتعمل ايه؟
حاكمهوم هتوثق جرائم النظام اللى كلنا عارفين أنه عذبنا
وقتلنا ونهبنا من أكتر من 30 سنة وكلنا عارفين أن المجرمين كانوا محميين بالقانون
، ولو عاوزين نحاكم المجرمين يبقي لازم نعرف جرائمهم.
ممكن نبقي فاكرين جرائم زي حريق قطار الصعيد وكنيسة
القديسين والعبارة ومجزرة ماسبيرو أو بورسعيد، بس أكيد جرايمهم أكتر من كده بكتير،
فى كل حي ومنطقة فيه ظابط كان بيعذب الناس وأكيد كان فيه مسئول بيسرقنا، واحنا
عاوزين نعرفهم ونعرف عملوا ايه، عاوزين نعمل قرار اتهام شعبي الناس اللى تكتبه. وبعد
ما نعرف جرائمهم نحاكمهم فى محكمة جنايات الثورة.
طيب ايه نظام العدالة الثورية دا ؟
احنا عاوزين نعمل 3 هيئات واحدة عشان التحقيق اسمها هيئة التحقيق والمحاسبة والتانية عشان التعويض
ومساعدة ضحايا جرائم نظام مبارك اسمها هيئة التعويض وأخر هيئة اللى هيا المحكمة
اللى هنحاكم فيها أفراد نظام مبارك واسمها محكمة جنايات الثورة.
كل الهيئات اللى فاتت محدش من اللى كانوا فى مناصب عليا
هيكون عضوا فيها، يعني مش هيكون فيها النائب العام ولا قضاة كانوا بيكتبوا أزهي
عصور الديمقراطية، كمان الهيئات دي هتستند على اتفاقيات حقوق الإنسان، وهيبقي
عندها سلطة توقف المجرمين عن العمل.
طيب هل دا معناه أننا عاوزين نحاكم كل اللى اشتغل فى
الحكومة؟
طبعا الكلام دا مش مظبوط، احنا عاوزين نحاكم المسئولين
اللى كانوا بيحكمونا فى مؤسسات الدولة سواء فى الداخلية أو الحكومة أو فى مجلس
الشعب أو القضاء، والناس اللى نهبتنا وقتلنا مش كتير فى مصر.
طيب هنعرف ازاي نحدد مجرمين النظام؟
هنعرف نحددهم لاننا هنعمل هيئة علشان تاخد البلاغات
والشكاوي من الناس على الجرايم اللى حصلت من سنة 1980 وحتى تولي رئيس الجمهورية
الحكم، وتحقق فيها وتعمل ملفات للمجرمين والهيئة دي فيها قضاة وحقوقيين متخصصين،
وبعدين هتسلم الملفات دي لقضاة تانيين ييتهموا المجرمين دول ويحولوهم على محكمة
جنايات الثورة علشان يتحاكموا.
طيب احنا هنستفيد أيه لما نحاكمهم ؟ احنا مش عاوزين
البلد تولع !!
بالعكس لو حاكمنا المجرمين البلد هتستقر ومش هيحصل
انفلات امنى ولا كانت هتحصل مجزرة بورسعيد ولا ماسبيرو ولا محمد محمود وغيرها،
كمان لو حاكمناهم مفيش حد تاني هيفكر أنه يمد أيده علي فلوسنا ولا علي مصري أو
مصرية فى الفترة اللى جاية، وعشان السلطة الجديدة تعرف أنها هتتحاكم لو ظلمتنا.
كمان هنرجع فلوسنا اللى نهبوها فى 30 سنة وكمان المصريين
هيحسوا بأن بلدهم بقت بتاعتهم وأن الثورة جابتلهم حقهم، علشان كده مفيش مصالحة قبل
المحاكمة.
طيب ايه ممكن أعمله مع حاكموهم؟
تقدر تنشر فكرتنا وتكلم الناس عنها، كمان تقدر توقع على
العريضة الشعبية لمحاكمة النظام وتطبيق العدالة الثورية، كمان ممكن تدور على
المجرمين اللى فى الشارع بتاعك أو المصنع بتاعك أو الحي أو الشركة، وتوثق جرائهم،
وتعملوا مجموعة لحاكمهوم فى المكان اللى تختاره وتقولنا علشان نساعدك باستمارات
التوثيق والمحامين وكل الحاجات اللى ممكن تحتاجها.
معكم قلبا وقالبا وانا وزملاءى ... وحتى نلتقى اليوم
ردحذفمعاكم طبعاً ويا ريت يكون فيه أى أنشطة فى الأسكندرية
ردحذف